Zera irakurri dut, Adimen Artifizialari esker minbizia sendatzeko urrats itzelak egingo direla. AA horiek medikuek ikusten ez dituztenak antzematen dituzte. Bestalde, AA erabiltzen ari ei dira fusio nuklearraren prozesua kontrolatzeko eta egonkortzeko. (Ikus cnnespanol.cnn.com/2024/02/21, munduko makinarik potenteenak (sic) erakusten dituen bideoa eta guzti).

Minbizirik gabe eta energia murrizketarik gabe biziko gara. Laster. Bankuak ere fusio prozesuetan hasiko dira AAren aholkuei jarraiki. Estatuen mugak gainditzen hasi dira dagoeneko fusioak. Italiar banku batek banku alemaniar bat erosiko duela iragarri du.

Batzuek badute interesik ekonomiaren elur bola azkarragotzeko, handiagotzeko. Hazkunde ekonomikoak mugarik ez du. Planeta asko dauzkagu, ekonomia hazkor bakar bat. Eta ekonomiaren lema Musk, Bezos, Zuckerberg bezalako lemazainek gobernatzen dute. Gogoratzen Rodrigo Rato? International Monetary Fund-eko zuzendaria, Espainiako presidenteordea, presidente izateko faboritoa, Ekonomia eta Ogasuneko ministroa, black txartelen onuraduna, putazalea… (Más…)

“Planeta asko ditugu, ekonomia bakarra” Die PARTEI, Alemaniako alderdi politikoaren eslogan ospetsu hura defendatzen dute, egun, muturreraino baina aipatu gabe, Europako alderdi politiko gehienek.

Ekonomia, merkatuaren agintzapean funtzionatzen duen eta azken finean esku ikusezinaren gidaritza orojakilearen menpe primeran funtzionatzen duen, —eliteentzat bai behintzat—, izate sakratu hori.

Gure sistema ekonomikoa: hazkunde ekonomikoa. Kapitalak mozkin altuena bermatzen duten enpresetara mugitzen dira ia trabarik gabe. Dena diruz neurtzen, kuantifikatzen da. Adibidea, lehen oihana zegoen tokian ez zegoen ezer. Egurra moztu eta saldu, soja genetikoki moldatuta landatu eta belar txarren kontrako pozoiei esker soja uzta bikainak lortu eta mozkin potoloak. Abereentzako bazka. Aberastasuna. (Más…)

Falta dira zientzialari baikorrak. Oraingo egoera beste krisi igarokor txiki bat besterik ez dela defendatuko duten zientzialariak. Entzun nahi dugu segi gaitezkeela gure ohiko bizitzarekin, lasai.

Zientzialari ezkorrek planetak muga fisikoak dituela aldarrikatzeko gero eta oldarkorrago dabiltza. Laster diesela faltako dela, eta ondorioz baita zerealak ere. Ezin ei diogu etengabeko hazkunde ekonomikoari beste mende erdian eutsi. Igaro omen ditugu petrolioaren eta uranioaren gailurrak eta horrek desazkundea ekarriko du, ezinbestean.

Planetako mugekin beldurtu nahi gaituzte: larrialdi klimatikoa, ozeanoen azidifikazioa, ozono-geruzaren zuloak, nitrogenoaren eta fosforoaren zikloaren usteltze prozesuak, lehorteak, deforestazioa eta beste lurzoruaren erabileran, biodiber-tsitatea galtzea, atmosferako partikulek eragindako kutsadura, kutsadura kimikoa, plastikoak gure erraietan, gerra hotzaren berotzea, oinarrizko mineralen eskasia, kobre, litio, kobalto, AMOC korrontearen moteltzea… (Más…)