Sare sozialetan denetarik topa daiteke. Niri zientzia eta sinesmenak interesatzen zaizkit. Ez besterik.Kosmologiaz, erlatibitateaz, multiunibertsoez eta erlijio berdaderoaz nire burua janzten eta janzten ez dut inoiz atsedenik hartu. Biokimika, nanoteknologia, informatika kuantikoa, aljebra eta topologia bezalako kontuekin ere, aditua naiz. Bizitza honetan jakin daitezkeen gauzak bi multzotan banatzen dira, zientziaren bidez jakin daitezkeenak, gutxi, eta fedearen bidez jakin daitezkeenak; beste guztiak.

Baina sare sozialetan dena maila berean jartzen dute. Hortxe topatuko dituzu, debatean, ez-dakit-nongo ustezko jakintsu bat transgenikoak arriskutsuak ez direla esanez eta orburuaren dieta, sagarraren dieta eta beste hamaika dieta egin eta gero edozein nutrizionistek baino gehiago dakien jakintsu bat. Hortxe topatuko dituzu, debatean, gizakiaren ez-dakit-zein katebegi galdu aurkitu duen sasijakintsua eta kreazionismoa Biblia Santuko jatorrizko testuetatik ikasi duen aditua. Hortxe topatuko duzu, debatean, unibertsitateko —mafia alaenak!— ustezko geologo(-edo) bat, eta mundua zeru azpian eta infernuaren gainean dagoela ondo dakien beste bat eztabaidan, biak maila berean egongo balira bezala.

Txarrena da inork ez duela nabarmentzen bata Jaungoikoaren grazian dabilela eta bestea ez.

Gorka Azkarate © humorenlared.com