Zaila izan zen tabakoa toxikoa zela frogatzea. Tabako industriak milioiak zeuzkan balizko toxikotasunari buruzko zalantzak zabaltzeko eta milioiak tabakoaren aldeko publizitatean xahutzeko. Hollywoodeko erreferentziazko aktoreek pantailetan erretzen zuten, intelektualek telebistako platoetan. Tabakoak adi egoten laguntzen zuen, erlaxatzeko balio zuen. Arriskutsu? Bizitzea da arriskutsu.

Hamarkadak behar izan ziren gaur egun zigarro paketeetan argazki errealistetan ikusten diren efektuak tabakoarekin lotzeko.

Desagertu zen tabakoaren publizitatea kirol estadioetatik, pantailetatik, Hollywoodeko aktoreek ez zuten pantailetan erreko, eta gurasoek eta irakasleek utzi zioten umeen aurrean erretzeari. Edo utzi zioten erretzeari. (Más…)

Europarrok segurtasun gehiago behar dugu. Ez etxetik ogia erostera irteten bagara okupa batzuk sartuko direlako gure etxean, ez. Kontua larriagoa da. Putinek Europa konkistatu nahi du. Arma gehiago behar ditugu. (Oraingoz, gero soldaduak ere beharko, jakina). Zifra bat bota digute. 800.000.000.000 euro. Argitaratuta dago.

Matematiketan ez bagaude oso jantzita ―eta kopuru potoloekin hasten direnean, ez gara egoten―, kalkulagailua behar.

Duela gutxi bizikleta bat erosi dut, 200 euro. Bigarren eskukoa. Berria izanez gero, 400 bat euro. Makina ona.

Armetan gastatu nahi duten diru horrekin 2.000.000.000 bizikleta berri eros daitezkeela dio ene kalkulagailuak. Europar Batasunean 450 milioi bat pertsona bizi bagara, armetan gastatu nahi duten diru horrekin Europar Batasuneko biztanle bakoitzarentzat 4,4 bizikleta berri erostea genuke. Ume jaio berrientzat eta hilzorian daudenentzat ere bai. (Más…)

Barkatu. Aurten ere, berriro, galdu egin dut EITB maratoian parte hartzeko aukera. Barkatu; tokirik ez hemen ene aitzakiak zerrendatzeko. Aurten kontua zen 16 orduz ‘Eskutitza’ izeneko abestia abestea, toki publikoetan, koreografiarekin. Horrela ibili ziren Gasteizko parlamentariak abesten, irribarretsu dantzatzen. Haiek eta beste ospetsu asko kameren aurrean, eskuekin bihotzak irudikatzen.

Aurten bihotzaren gaixotasunak ikertzeko, iaz minbizia, aurrekoan esklerosi anizkoitza… Errekorra, iaz lortu omen zuten: 1.228.290 euro bildu ei ziren. Pozik, irribarretsu.

Nire utzikeriak ez dauka barkamenik. Baina datorren urtean adi, txintxo, ibiliko naiz. Abestuko ditut abestu beharrekoak, egingo ditut egin beharreko keinuak eta dantzatuko naiz proposaturiko koreografiekin. Eta aurreko hamarkadetan eman ez ditudan dirulaguntzak datorrenean emango ditut. (Más…)