Etorkizun hurbiletik abisu bat igorri digute: “Garai haietan, zuen arbasoek hainbat mitotan sinesten zuten. Kontsumoak oparotasuna zekarrela sinesten zuten eta etengabeko aurrerabide zientifiko- teknologikoak krisi guztiak konponduko zituztela. Esate baterako, neguaren hasieran, kapitalismo kontsumistaren jaiak gero eta lehenago hasten ziren. Halloween, Black Friday, Black Week, Black November, Cyber Monday, Thanksgiving… Zuen arbasoek ez zekiten ondo zer ospatzen ari ziren, kontua zen erosteko eskaintza bereziak aprobetxatzea, eta behar ez zenituzten hamaika gauza erostea, prezio merkeetan. Objektuak, arropak-eta, metatzeko, beharrik gabe ordezkatzeko, edo ezagunei opariak egiteko.

Batzuek ondo zenekiten oparotasun energetikoa agortze bidean zebilela, hala ere hiriak argi elektrikoz mukuru betetzen zenituzten kontsumoaren pizgarri. Selfieak egiten zenituzten kalean Gabonetako argien aurrean. Oraindik ere lehengaiak geratzen zitzaizkizuen auto elektrikoak fabrikatzeko eta autoek oinezko asko harrapatzen zituzten Gabonetako selfieak egiten kale argitsuen erdian irribartsu.
(Más…)

Uda 2023ko krispetak jateko sugetzarra Rubialesen musutxoaren kontua izan da. Feminismo faltsuaren salatzailearen balentriak eta ahoberokeriak.

Rubiales bezalako crack batek dozena pare bat post-dok-zientzialari-ikertzailek eta Tarot irakurle pare batek baino soldata handiago eramatea gure sistema ekonomikoaren akats bezala seinalatu beharrean, batzuek erraz justifikatzen dute: bakoitzak sortzen duen aberastasunaren arabera kobratzen du.

Gizonezko futbolariek eta Iker Jiménezek sortzen dute aberastasun handia; zaintzaileek, zientzialari-ikertzaileek, langile arruntek, nekazariek-eta, txikia. Batez ere emakume badira. Urtainek sortzen zuen, aberastasuna, frankismoan, eta El Corte (de) Inglesek. Sindikalistek ez. Emerituak, Francoren oinordekoak, berak bakarrik, Gurutzetako ospitaleko profesional guztiek batera beste aberastasuna sortu zuen, atzerrian dirua gorde eta Arabiara alde egin baino lehen.
(Más…)

Pentsa daiteke nominan dauden spin doctors horien aholkue jarraiki erantzun ziela aurreko batean Hezkuntza sailburuak kazetari zorrotzari (Irati Urdalleta, Berria, 2023-6-3).

Garaietan esaten zen bezala, kandela bat Jaungoikoari eta beste bat Deabruari. Koherentzia politikoak aspaldian eman dituen perlarik distiratsuenak lortu zituen Urdalletak.

Irakurleok pozik geratu ginen izenburutik bertatik. “Sailburua, itunpekoen alde, beti; eskola publikoa ardatz, noski”. Ona lerroburua.

Hezkuntza Lege berriarekin ‘euskara ardatz izango da’, iragarri zigun, (baita erdaraz curriculumaren % 80 antolatzen duten zentroetan ere). Euskara irakasgaian ebaluazioa eta kalifikazio gogaikarrietatik salbuetsita geratzen diren ikasleak aipatu ez.

Irakurle batzuk zer pentsa ez genekiela geratu ginen irakurri genuenean Lege berriak laikotasuna bermatuko duela, besteak beste beren estatutuetan katolizismoaren baloreak sustatzeko asmoa aitortzen duten eskola kristauetan. (Más…)